Maral Rəhmanzadə 23 iyul 1916-cı ildə Bakı şəhərində, Mərdəkan qəsəbəsində anadan olub.
Atası Maralı Azərbaycan Dövlət Rəssamlıq Texnikumuna, yaxın dostu-rəssam Əzim Əzimzadənin sinfinə qoyur. Maral, 1934-1940-cı illərdə təhsilini Moskva Dövlət Rəssamlıq İnstitutunda davam etdirir. Orada ailə qurur, lakin II Dünya Müharibəsi başlayanda, həyat yoldaşı cəbhəyə yollanır, Maral isə Bakıya dönür. 1941-ci ildə Maralın atası xalq düşməni kimi həbs edilir, bir neçə aydan sonra isə vəfat edir. Maral qəzet və jurnallara illüstrasiyalar çəkməklə ailəsinə baxır.
Maral Rəhmanzadənin Neft daşlarını ziyarət edən ilk rəssamlardan olmuşdur. Neft Daşlarının bir çox veteranı uzun illər xatırlayırdı ki, "bir vaxtlar əlində albomu olan bu gözəl və gənc qadın həm sakit havada, həm də fırtınada yanlarında idi. O, cəsur insanların hətta ekstrimal şəraitdə ağır işlərini etməyini, qorxunc, qəzəbli Xəzər dənizinin ortasında həyatlarını öz gözləri ilə görmək istəyirdı”.
Neft Daşlarında çəkilmiş əsərlər, iki ay Bakıda Respublika İncəsənət Muzeyində, sonra Neft Daşlarının özlərində işləyən sərgidə yer tutmuşdular. Moskvada, daha sonra Londonda sərgilər təşkil edilmişdir. Maral Rəhmanzadənin “Neft daşları” silsiləsi hal-hazırda Londonda, Kral rəssamlıq akademiyasında yerləşir.
Maral Rəhmanzadə kitab qrafikası sahəsində də fəaliyyət göstərib. O, Nizami, Füzuli, M.S.Ordubadi, M. F. Axundzadə , A.S.Puşkin və M.Y.Lermontovun əsərlərinə çəkilmiş illüstrasiyaların müəllifidir.
1960-cı illərdə Maral Azərbaycanın müxtəlif bölgələrini gəzir və əsərlər yaradır. Səfərlərin biri o zaman yolu olmadığı Xınalıq kəndinə olur. "Bizim qızlar", "Mənim bacılarım", "Doğma Vətənim", "Azərbaycan" və s. əsərlərində Azərbaycan kəndinin həyatını, təbiətini təsvir etmişdir.
Maral Rəhmanzadə 2008-ci il mart ayının 16-da vəfat etmiş və Mərdəkan qəbiristanlığında dəfn olunmuşdur.
Hal-hazırda, rəssamın əsərləri Tretyakov qalereyası (Moskva), Azərbaycan Dövlət İncəsənət Muzeyi, Azərbaycan Dövlət Rəsm Qalereyası və s. muzeylərdə, ABŞ və İngiltərədə şəxsi kolleksiyalarda saxlanılır.
