Gülşən Ağadadaş qızı Qurbanova 19 dekabr 1950-ci ildə Bakıda anadan olub.
Gülşən xanım orta təhsilini 175 saylı məktəbdə alıb. Aktrisa 1974-cü ildə Azərbaycan Dövlət Mədəniyyət və İncəsənət Universitetini bitirib. O, 1979-2006-cı illərdə Azərbaycan Dövlət Gənc Tamaşaçılar Teatrında aktrisa kimi fəaliyyət göstərib.
[http://www.anl.az/el/emb/TEATR/aktyorlar/gulshen_qurbanova.htm]
Gülşən xanım 20-dən artıq filmdə (“Ad günü”, “Adam ol”, “Anlamaq istəyirəm” və s.) çəkilib. Aktrisanın sonuncu dəfə çəkildiyi film “Bir dəfə Qafqazda” olub.
Gülşən Qurbanova, həmçinin “Qaynar qazan” verilişinin aparıcısı olub.
1989-cu ildə Gülşən Qurbanova “Azərbaycan Respublikasının Əməkdar artisti”, 1998-ci ildə “Xalq artisti” fəxri adlarına layiq görülüb. [https://az.baku-art.com/az/xalq-artisti-gulshen-qurbanovanin-an-m-g-n-d-r] Gülşən Qurbanova 17 noyabr 2006-cı ildə Bakıda vəfat edib. Ailə üzvləri aktrisanı Fəxri xiyabanda dəfn etməyə çalışıblar, lakin buna nail ola bilməyiblər. Onun ölümündən sonra diri-diri torpağa tapşırılması barədə xəbərlər yayılıb. Ehtimal olunur ki, ölümündən bir neçə gün sonra aktrisanın qəbri yaxınları tərəfindən açılıb. Bununla bağlı belə deyilirdi: “Kəfəni cırıblar. Görüblər ki, üz-gözü cırıq-cırıqdır. Sağ əli qulağının dibində qalıb. Bundan sonra belə qənaətə gəliblər ki, əslində o, dəfn edilərkən sağ imiş”. [Unikal.- 2020.-21 noyabr.- S.20]
