Vəfa Fətullayeva 25 avqust 1945-ci ildə Bakıda anadan olub.
Vəfa hələ uşaqlıq illərindən anası ilə birgə teatr tamaşalarında çıxış edib. Doqquz yaşı olanda Şekspirin “Qış nağılı” pyesində kralın oğlu “Mamili” obrazını canlandırmışdır.
O, 1971-ci ildə İncəsənət İnstitutunun teatrşünaslıq fakültəsini bitirmişdir. 1970-ci ildən Azərbaycan Dövlət dram teatrında işləyirdi. Teatrda Gülgəz ("Mahnı dağlarda qaldı", İlyas Əfəndiyev), Şirin ("Məhəbbət əfsanəsi", Nazim Hikmət), Tənzilə ("Sən yanmasan", Nəbi Xəzri) və başqa rolları canlandırırdı. "Göz həkimi", "Alov", "Atayevlər ailəsi" və s. televiziya tamaşalarında da çıxış edirdi.
1982-ci ildə Vəfa Fətullayeva Azərbaycan SSR əməkdar artisti fəxri adına layiq görülmüş, 1984-cü ildə isə Azərbaycan SSR Dövlət Mükafatı laureatı olmuşdur.
Keçən əsr 80-ci illərin ortalarında Vəfa Fətullayeva qan xərçəng xəstəliyinə tutulur. Çox keçmir ki, xəstəlik özünü göstərməyə başlayır, səhhəti zəifləyir.
1987-ci il may ayının 21-də aktrisa Vəfa Fətullayeva 42 yaşında xəstəxanada dünyasını dəyişib.
