Spaso-Preobrajenskaya Beloqorodskaya kilsəsi Bakının indiki 8 Noyabr prospektində yerləşirdi.
XIX əsrin sonlarında Qara şəhərdə işçilərin sayının artması ilə əlaqədar kilsənin tikintisinə ehtiyac yarandı. Buna görə də Şibayev zavodunun rəhbərliyinin təşəbbüsü ilə burada pravoslav kilsəsi inşa etmək qərara alındı. Zavodda məbədin tikilməsi təşəbbüsü direktor N.N.Sokolov, mühəndis-texnoloq A.R.Kulişevskiy və başqalarına məxsus idi.
15 dekabr 1891-ci ildə Şibayev fabrikində kilsənin təməli qoyuldu. Kilsənin inşası xəbəri həvəslə qarşılandı, buraya çox sayda ianə edildi, zənglər bağışlandı. Burada qurbangah da inşa edildi. Binanın tutumu 200-ə qədər insan təşkil edirdi. [https://www.pravoslavie.az/eparchy/churches/?id=13699]
26 mart 1893-cü ildə təntənəli şəkildə ruhanilərin və xalq kütlələrinin iştirakı ilə kilsənin müvəqqəti zəng qülləsinə 60 pud ağırlığında (983 kq) yeni zəng qaldırıldı. Bu zəng qismən “Şibayev və Ko” firması tərəfindən, qismən də zavodun işçilərinin ianələri hesabına alınmışdır.
1893-cü ildə “Şibayev və Ko” tərəfdaşlığı kilsəni genişləndirmək qərarına gəldi. Layihə memar Edel tərəfindən tərtib edildi. Bina 1894-cü ildə hazır oldu. Burada həm kilsə, həm də məktəb fəaliyyət göstərirdi. [Церковь Спасо-Преображенская (Белогородская), на Шибаевском заводе, Баку — OurBaku]
Bakı xristian məbədlərinin baş keşişi Yunitskiy kitabında kilsənin görünüşü haqqında məlumat verilir: “... Kilsə 7 pəncərə ilə işıqlandırılır ... Məbədi qonşu yaşayış binalarından fərqləndirən xarici bəzəklərinə binanın özündə yerləşən zəng qülləsi daxildir … Üzərində mis-zərli xaçı olan səkkizguşəli günbəzli zəng qülləsi rus-bizans üslubunda tikilmişdir. Zəng qülləsinin günbəzi dəmirlə örtülüb və yaşıl rəngə boyanıb... Zəng qülləsində 6 zəng asılıb”. [Юницкий А.И. История церквей и приходов Бакинской губернии (1815-1905 гг.). Баку-1906]
Sovet dövründə kilsədə texnikum yerləşirdi, daha sonra isə bina sökülmüşdür.
