Bakı vağzalı Nəsimi rayonunda, 28 May metro stansiyasının yanında yerləşir. Kompleks müxtəlif illərdə tikilmiş üç binadan ibarətdir.
1878-ci ildə Azərbaycanda ilk dəmir yolunun çəkilişi başlayıb. 1883-cü ildə Bakı-Tiflis dəmiryolu xətti tamamlanıb. Həmin il Bakıda ilk vağzal binası olan “Tiflis vağzalı” inşa olunub və bir il sonra istismara verilib. Tikili memar Xrisanf Vasilyev tərəfindən layihələndirilib. [https://azerhistory.com/?p=22559]
Bina Rusiya imperiyasının ən gözəl vağzallarından biri hesab olunurdu. Tikili şəhər tərəfdən ikimərtəbəli, platformadan isə birmərtəbəli quruluşa malik idi. Birinci mərtəbədə kassalar, baqaj bölməsi, ofislər; ikincidə - poçt, teleqraf, gözləmə otaqları və s. yerləşirdi. Divarlar şərq xalçasını xatırladan naxışlarla bəzədilmişdir.
[Г. Шугаев. Гостеприимное лицо Баку // Архитектура и дизайн: научно-художественный журнал. Москва-2004]
1926-cı ildə elektrikləşdirilmiş Bakı-Sabunçu dəmir yolu sərnişinlərinə xidmət göstərməsi üçün, ikinci bina - “Sabunçu vağzalı” (28 may metrostansiyasının sağ tərəfində yerləşən bina) tikilmişdir. Həmin binanın memarı Nikolay Bayev olmuşdur. Bu SSRİ-də elektrik qatarlar üçün nəzərdə tutulan ilk vağzal idi. [Бакинский железнодорожный вокзал- Тифлисский вокзал (Баку) — OurBaku]
Fransız yazıçı Jül Vern “Klodius Bombarnak” əsərində vağzal haqqında belə yazırdı: “… görkəmli bir dəmiryolu vağzalı, Amerika və ya Avropanın istənilən böyük şəhərinə layiqdir”. [Жюль Верн. Клодиус Бомбарнак. Пер. с фр. - Н.Брандис, Е.Брандис. Москва-1989]
1977-ci ildə “Sabunçu” vağzalı fəaliyyətini dayandırıb. Həmin il “Tiflis” vağzalında yenidənqurma işləri aparılıb və burada köhnə vağzal binasına bitişik yeni müasir vağzal binası tikilib. Sərnişinlərə xidmət üçün nəzərdə tutulan və mehmanxanası olan 16 mərtəbəli vağzal binası Cənubi Qafqazın bu tipli ən böyük tikilisi sayılırdı. [https://azerhistory.com/?p=5163]
Həmin bina 2017-ci ildə təmir olunub və bu gün vağzalın əsas binası kimi fəaliyyət göstərir. “Tiflis” və “Sabunçu” vağzallarında isə hal-hazırda müxtəlif ticarət obyektləri yerləşir.
[URIS id=29199]
