Üzeyir Hacıbəyov adına Bakı Musiqi Akademiyası (BMA) Bakı şəhərinin Nəsimi rayonundakı Ş. Bədəlbəyli küçəsi, 98-də yerləşir.
[http://irs.gov.az/location/azerbaycan-d%C3%B6vlet-musiqi-akademiyasinin-binasi]
1920-ci ildə Rus Musiqi Cəmiyyətinin Texnikumu bazasında Bakıda Xalq Konservatoriyası yaradılıb. 25 may 1921-ci ildə bu müəssisə Azərbaycan Dövlət Konservatoriyası kimi fəaliyyət göstərməyə başlayıb. Professional musiqiçilərin yetişdirilməsi məsələsi ilk dəfə burada qaldırılıb. Həmin tədris ocağının proqramının yaradıcısı bəstəkar Üzeyir Hacıbəyov olub. [Azərbaycan Sovet Ensiklopediyası. Cild I. Bakı-1976]
Müəssisədə azərbaycanlılar azlıq təşkil edirdi. Bu səbəbdən 1922-ci ildə Azərbaycan Dövlət Türk Musiqi Məktəbi yaradılıb. Müəssisə, əsasən, azərbaycanlı tələbələri qəbul edirdi. Məktəbə Hacıbəyov özü rəhbərlik edib və məktəbin birinci təhsil ilində 383 tələbədən 350 nəfəri azərbaycanlı olub. 1926-cı ildə bu məktəb konservatoriya ilə birləşib. [Azadlıq.- 2012.- 17 yanvar] [Келдыш Ю. В. Музыкальная энциклопедия. Том 1. Москва-1973]
Konservatoriyanın ilk rektorları rus pianoçular - Matvey Pressman və İlya Aysberq olub. Lakin konservatoriyanın inkişafında mühüm rol Üzeyir Hacıbəyova məxsus idi. 1939-cu ildə bəstəkar rəsmi olaraq, konservatoriyanın rəhbəri seçilib.
1930-cu illərdə konservatoriyanın nəzdində musiqi fəhlə fakültəsi (Rabfak) təşkil edilib. Onun məqsədi musiqi təhsilinə Azərbaycan millətindən olan fəhlə nümayəndələri cəlb etmək idi. Fəhlə fakültəsində gələcəyin bəstəkarlarından - Qara Qarayev, Cövdət Hacıyev, Tofiq Quliyev, Zakir Bağırov təhsil alıblar. [Azadlıq.- 2012.- 17 yanvar]
1941-ci ildə müəssisə Dimitrova (indiki Ş. Bədəlbəyli), 98 küçəsində yerləşən təzə binaya köçürülüb. Binanın memarları Sadıq Dadaşov və Mikayıl Useynov olub. 1948-ci (1949) ildən konservatoriya Üzeyir Hacıbəyovun adını daşıyır. [Баку исторические и достопримечательные места. Баку-1956]
1994-cü ildən isə konservatoriya Bakı Musiqi Akademiyası adlanır. [http://mugam.musigi-dunya.az/ru/b/BMA.html]
