Bakının Nərimanov rayonunun Əhməd Rəcəbli küçəsi, 13 ünvanında yerləşən skamyada çılpaq yatan kişi saxlanılıb. Bu haqda bu gün, 6 noyabr tarixində Bakuplus.az Qafqazinfo-ya istinadən xəbər verir.
Sözügedən ərazidə yaşayan sakinlərdən biri polis şöbəsinə bir nəfərin binanın qarşısında sərxoş və çılpaq vəziyyətdə yatması, qışqırması və uşaqları öldürəcəyi ilə hədələməsi barədə məlumat verib.
Nərimanov RPİ-nin 18-ci Polis Şöbəsinin əməkdaşları əraziyə gələrək həmin şəxsi müəyyən ediblər. O, müqavimət göstərərək polislə getmək istəməsə də, saxlanılıb.
Şöbəyə aparılandan sonra məlum olub ki, 46 yaşlı S.Salahov (şərti) Lənkəran rayonunun Boladi kənd sakinidir. Onun barəsində inzibati protokol tərtib edilib. Həmçinin Nərimanov Rayon Məhkəməsinin qərarı ilə ona 10 sutka inzibati həbs cəzası verilib.
