Bakıda qabaqcadan əlbir olaraq qətl törətməkdə təqsirləndirilən Elşən Müzəffərov, Gülnar Müzəffərova və Qasım Xankişiyevin cinayət işi üzrə məhkəmə baxışı başlayıb.
Apa.az xəbər verir ki, Bakı Ağır Cinayətlər Məhkəməsində hakim Fəxri Məmmədovun sədrliyi ilə keçirilən prosesdə məhkəmə istintaqının başladığı elan olunub.
Dövlət ittihamçısı ittiham aktını səsləndirib. Məlum olub ki, hadisə qısqanclıq zəminində baş verib.
E.Müzəffərov qaynı Q.Xankisiyevlə birlikdə qonşuları Səxavət İsmayılovu yaşadığı həyətdə boğub öldürərək meyitini öz yaşadıqları həyətdə qabaqcadan qazdıqları çuxurda basdırıblar.
Hadisədən xəbər tutan yaxın qohumlardan biri bu barədə polisə xəbər verib.
Elşad Müzəffərov elan olunmuş ittihamla özünü təqsirli bilib.
Digər iki şəxs isə özlərini təqsirli bilməyib.
Proses mayın 13-də davam etdiriləcək.
Qeyd edək ki, hadisə ötən ilin noyabrında Bakının Qaradağ rayonunun Sənqəçal qəsəbəsində baş verib.
İstintaqla müəyyən olunub ki, qəsəbə sakini, 1986-cı il təvəllüdlü Səxavət İsmayılov qonşuları 1995-ci il təvəllüdlü Elşən Müzəffərov və arvadı 1997-ci il təvəllüdlü Gülnar Müzəffərova tərəfindən yaşadıqları evin həyətində boğularaq öldürülüb, meyiti isə həyətlərində basdırılıb.
Qətli törətməkdə şübhəli bilinən şəxslər hadisədən sonra saxlanılıb.
İbtidai istintaq zamanı cinayət işində iştirakçı kimi şübhəli bilinən daha bir nəfər - Qasım Xankişiyev də müəyyən olunaraq saxlanılıb.
Onların barəsində Cinayət Məcəlləsinin 120.2.1-ci (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə) maddəsi ilə ittiham elan olunub.
