Abşeron Rayon Məhkəməsində qəsdən sağlamlığa az ağır zərər vurmada təqsirləndirilən Dilavər Hacıyevin (ad, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Firuzə Kərimovanın sədrliyi ilə keçirilən prosesdə hökm oxunub.
Məhkəmənin hökmü ilə cinayət işi üzrə icraata xitam verilib və o, cinayət məsuliyyətindən azad edilib.
İttihama görə, hadisə ötən ilin dekabr ayında Abşeron rayonu, Masazır qəsəbəsində qeydə alınıb. Belə ki, Dilavər Hacıyev ayıq sürücü xidmətinə sifariş əsasında zərərçəkmiş Malik Salahova (ad, soyadı şərtidir) məxsus “Hyundai Grandeur” markalı avtomobili idarə edib. Yolda gedərkən təqsirləndirilən şəxs avtomobillə manevr hərəkətləri edib. Malik də buna görə ona irad bildirib, maşını saxlatdıraraq Dilavərin ünvanına təhqiredici ifadələr işlədib. Sonra onların arasında mübahisə yaranıb. Bu zaman Dilavər qəsdən yumruq və yerdən götürdüyü daş parçası ilə zərərçəkmiş şəxsin sifət nahiyəsinə vuraraq, ona yüngül xəsarət yetirib.
Hadisədən sonra Dilavər Hacıyev saxlanılıb və barəsində başqa yerə getməmək haqqında iltizam qətimkan tədbiri seçilib.
