“Meyxana toyları pis günə salıb. Toylarda meyxana keçmişdə də olub. Bunun üçün meyxanaya müəyyən bir vaxt ayırardılar, toy sahibindən icazə alıb oturardılar. Amma indi gedib oturursan toyda, meyxanaçı gəlib əvvəldən axıra qədər meyxana deyib gedir. Bu nə deməkdir?”
Bu sözləri apa.az-a müsahibəsində xanəndə, əməkdar artist Aqil Məlikov deyib.
O qeyd edib ki, meyxanaçılar istedadlı adamlardı, Allah onlara vergi verib: “O verginin üstünə elm, savad, dünyagörüşü əlavə etmək lazımdır. Televiziyanı açırsan - meyxana, toya gedirsən - meyxana... Onların arasında çox istedadlı adamlar var. Onlara deyirəm gedin, şeir yazın. Əliağa Vahid də meyxana deyirdi. O, şair idi. Bir şeyin gərək faydalılıq dərəcəsini nəzərə alasan. Mənim o uşaqlara çox hörmətim var. Amma gərək sözün yerini biləsən”.
