“Verilişlərin hamısı bir-birinin təkrardır. Biri ərin qoyub qaçıb, biri arvadın. Mən də parlamentdə dedim ki, bütün günü arvad boğuşması verirlər. Belə şeylər millətin əxlaqına zərbədir. Azərbaycanda neçə arvad ərin qoyub qaçar? Olsun 10 nəfər. Sən bunu 10 milyona şamil eləyə bilməzsən axı. O qədər göstərirlər, evdə baxanda fikirləşir ki, o qoyub qaça bilir, mən niyə qaçmayım?”
Bu sözləri Kulis.az-a müsahibəsində yazıçı, millət vəkili Aqil Abbas deyib.
Aqil Abbasın sözlərinə görə, Avropa çalışır ki, bizdə ailə dəyərləri pozulsun: “Bunun üçün pul buraxırlar. Ailə dəyərləri dağılanda, Azərbaycan olmayacaq. Bəziləri deyir ki, sosial verilişlər müəyyən məsələləri həll eləyir, bəziləri də deyir ki, bunun üçün hüquq-mühafizə orqanları var. Mənim o verilişlərdə bir şeydən xoşum gəlir ki, xəstə adamlara kömək eləyirlər. Evi olmayana sığınacaq verirlər. Çox vaxt da həkimləri dəvət eləyirlər. Ancaq o verilişləri başqa, arzuolunmaz tərəfi də var. Deyir, milçək bir şey deyil, amma yenə də ürək bulandırır. Boşanmaların artmasında bu tip verilişlərin ciddi təsiri var”.
