Yeni il günü Bakıda tanışını qətlə yetirən 2 nəfərə hökm oxunub. Bu haqda 12 oktyabr tarixində Bakuplus.az Lent.az-a istinadən xəbər verir.
Yeni il günü tanışını öldürən və CM-nin “Qəsdən adam öldürmə” maddəsi ilə təqsirləndirilən Neftçala rayon sakinləri 47 yaşlı Elşən Gözəlova və 28 yaşlı Cəmil Hüseynova hökm oxunub. Bakı Ağır Cinayətlər Məhkəməsinin hökmü ilə cəzalarını ciddi rejmli cəzaçəkmə müəssisəsində çəkməklə Cəmil Hüseynov və Elşən Gözəlov 18 il müddətinə azadlıqdan məhrum olunublar.
Belə ki, 2020-ci il dekabrın 31-də 35 yaşlı Röyal İlyasovun meyiti yaşadığı evin yaxınlığında aşkar olunub. Polisin araşdırması nəticəsində məlum olub ki, İlyasov Gürgan qəsəbəsi, İlqar Məcidov küçəsindəki 24 saylı evin qarşısında ov tüfəngindən açılmış atəşlə qətlə yetirilib. Onun meyiti dəniz kənarında basdırıldığı çaladan çıxarılıb.
Araşdırma zamanı məlum olub ki, dekabrın 30-da Cəmil Hüseynov yaşadığı evdə tanışları Elşən Gözəlov, Röyal İlyasov və Rasim Ağayevlə birlikdə spirtli içkilər qəbul ediblər. Daha sonra Cəmil və Elşən Rasimi və Röyalı evdən qovub. Daha sonra, Cəmil Hüseynov və Elşən Gözəlov xuliqanlıq niyyəti ilə Röyal İlyasovu cəzalandırmaq qərarına gəliblər. Ayın 31-i gecə saat 2 radələrində 16 kalibrli ov tüfəngi ilə silahlanaraq İlyasovun yaşadığı binanın qarşısına gəliblər. Məcidov küçəsindəki 22 saylı binanın 2-ci mərtəbəsində yerləşən 5 nömrəli mənzilin qapısını döyən Gözəlov aralarındakı mübahisənin səbəbini tam aydınlaşdırmaq bəhanəsi ilə İlyasovu həyətə çağırıb. Həmin bina ilə üzbəüz, 24 saylı evin hasarının arxasında gizlənən Cəmil Hüseynov, yaxın məsafədən Röyal İlyasovun baş nahiyəsini nişan alaraq tüfəngdən atəş açıb. Röyalın öldüyünə əmin olduqdan sonra birlikdə meyiti kəndirlə bağlayıb Xəzər dənizi istiqamətində aparıblar. Orda çala qazmaqla cəsədi quma basdırıblar.
[caption id="attachment_74323" align="alignnone" width="640"]
Foto Lent.az saytı[/caption]
