Paytaxtın Nərimanov rayonu, Ağa Nemətulla, 26 ünvanında yerləşən binanın zirzəmisinə bir neçə gündür ki, kanalizasiya suyu dolub. Sakinlərin sözlərinə görə, kanalizasiya suyu binanın zirzəmisində təhlükə yaratmaqla yanaşı, pis qoxudan evlərində oturmaq belə onlar üçün çətin olub. Bu haqda bu gün, 26 yanvar tarixində Bakuplus.az ATV-yə istinadən məlumat verir.
Sakinlər deyirlər ki, bu cür problemlə onlar tez-tez qarşılaşırlar. Dəfələrlə aidiyyəti qurumlara müraciət etsələr də, nəticə yoxdur. Qoxu ilə yanaşı, binaya ağcaqanadlar da dolub.
“Azərsu”ASC-nin mətbuat katibi Anar Cəbrayıllı bildirdi ki, problemin yaranmasının səbəbi yaxınlıqda fəaliyyət göstərən kafedir:
“Kanalizasiya xəttinin üzərində kommersiya obyekti tikildiyindən bu gün Nərimanov rayon Sukanal İdarəsi tərəfindən həmin xəttə xidmət göstərmək mümkün deyil. Həmin xətdə yaranmış nasazlıqla əlaqədar binanın zirzəmisinə tullantı suların toplanılması halı müşahidə olunur. Bununla bağlı həm obyekt sahibinə, həm Rayon İcra Hakimiyyətinə məlumat verilib”.
Anar Cəbrayıllı, həmçinin bildirdi ki, obyekt sahibi ilə növbəti dəfə danışıqlar aparılıb ki, kanalizasiya xəttinin yenilənməsinə şərait yaratsın. Obyekt sahibi isə bu təklifə cavab verməkdən boyun qaçırıb.
