Nərimanov rayonunda sakinlər və tikinti şirkəti anlaşa bilmirlər. Bu haqda bu gün, 25 oktyabr tarixində Bakuplus.az ATV-yə istinadən xəbər verir.
Xətai prospekti, 38 üvanında yaşayan sakinlərin sözlərinə görə, 21 mərtəbəli bina 20 il əvvəl istifadəyə verilib. Lakin bu günə qədər binanın dayanacaq hissəsinin inşası bitməyib. Bundan əlavə, 1 blokda olan 3 liftdən 2-si icarəyə verilib.
“Biri banka icarəyə verilib, biri şəxsi liftdir, ancaq kartla işləyir. Bir dənə də liftimiz var, əhali bununla qalxır. Bu boyda əhali 1 liftin ümidinə qalıb”, – deyə sakinlər bildirirlər.
Həmçinin onlar bildirirlər ki, binada fəaliyyət göstərən uşaq bağçasının oyun meydançası yoxdur. Bu səbəbdən də istirahət zonasında tikinti etmək istəyiblər, ancaq sakinlərin şikayətindən sonra inşaat işləri dayandırılıb.
“Nəsimi 45” adlı mənzil mülkiyyətçilərinin müştərək cəmiyyətindən məsələ ilə bağlı bildirilib ki, ərazidə sadəcə söhbətgahlar tikilir.
“Bir neçə sakin binanın saxlanılması üçün aylıq ödənişi ödəməkdən qərəzli surətdə imtina edir. Bununla bağlı məhkəməyə də müraciət olunub”, – deyə cəmiyyətdən qeyd olunub.
Sakinlər isə deyirlər ki, ödənişlər tikinti şirkəti tərəfindən verilən vədlər yerinə yetirilmədiyindən olunmur. Mövcud problemlər aradan qaldırılmayanadək ödəniş etməyəcəklər.
