Nərimanov rayonunda piyada səkisinin tam ortasında elektrik qutusu var. Bu haqda bu gün, 7 fevral tarixində Bakuplus.az ATV-yə istinadən xəbər verir.
Adıçəkilən rayonun Qarabağ küçəsində yerləşən qutudan elektrik naqilləri çıxır. Qapısı isə kustar üsulla bağlanıb. Bu da ərazidən keçən insanlar, əsasən də uşaqlar üçün təhlükə saçır. Bundan əlavə, səkidən əlil və uşaq arabalarının keçməsi mümkünsüz olub.
“Hava qaralmışdı. Alnım dəydi düz qutunun ortasına. Hər dəfə gedəndə diqqət etməli olursan ki, toxunmayasan”, – deyə sakinlər şikayət edirlər.
Nə Bakı Şəhər İcra Hakimiyyəti, nə də “Azərişıq” məsələni həll etmir. Bu qurumlar qutunun onlara aid olmadığını vurğulayıb.
