Bakının Nərimanov rayonunun üç küçəsində abadlıq-quruculuq işləri başa çatdırılıb. Bu haqda bu gün, 20 dekabr tarixində Bakuplus.az “İDEA” İctimai Birliyinə istinadən xəbər verir.
Abadlıq-quruculuq işləri Faiq Yusifov küçəsi, 40, 42, 44, Yusif Vəzir Çəmənzəminli küçəsi, 106/44 və Əliyar Əliyev küçəsi, 65, 67, 69 ünvanlarını əhatə edib və 1600 nəfər sakin üçün nəzərdə tutulub.
Yenidənqurma işləri çərçivəsində süni örtüklü minifutbol stadionu, şahmat meydançası, müxtəlif idman qurğuları, eləcə də uşaq meydançaları salınıb.
Eyni zamanda ərazidə 18 söhbətgah, çoxsaylı oturacaqlar, tullantılar üçün qutular qoyulub, quş yuvaları və pişik evləri quraşdırılıb.
Binaların fasad və blokları təmir olunub, asfalt və dam örtükləri yenilənib, həyətdə elektrik sistemi, eləcə də yeni işıqlandırma dirəkləri və müşahidə kameraları qurulub.
Mövcud yaşıllıqların bərpası ilə yanaşı, ərazidə 540 müxtəlif növ ağaclar, 13.800 kol və 4500 mövsümi gül əkilib. Ümumilikdə 3500 kv.m sahədə yaşıllıq zolağı salınıb.
[URIS id=123979]
