Bakının Nərimanov rayonunda yerləşən bazarda nöqsanlar aşkarlanıb. Bu haqda bu gün, 9 may tarixində Bakuplus.az Qida Təhlükəsizliyi Agentliyinə istinadən xəbər verir.
Rayonun Təbriz küçəsi, 2 ünvanında fəaliyyət göstərən “Təbriz (Xırda)” bazarda sanitar-gigiyenik və sanitar-texniki vəziyyətin qənaətbəxş olmadığı, qida təhlükəsizliyi sahəsində texniki-normativ-hüquqi aktların tələblərinin pozulduğu aşkar edilib.
Həmçinin yoxlama zamanı ticarət obyektində süd məhsullarının saxlanması üçün kifayət qədər soyuducuların olmadığı, satışı həyata keçirilən ət və ət məhsullarının, süd və turşu məhsullarının minimum keyfiyyət və təhlükəsizliyinə dair müşayiətedici sənədlərin olmadığı, üzərində etiket məlumatları olmayan müxtəlif çeşiddə məhsulların satışının həyata keçirildiyi, müvafiq təmizlik işlərinin aparılmadığı məlum olub.
Aşkar olunmuş nöqsanlarla bağlı qanunvericiliyə uyğun olaraq, bazar rəhbəri məsuliyyətə cəlb olunub, açıq şəkildə satışı həyata keçirilən süd və turşu məhsulları, o cümlədən ət və ət məhsullarının satışı dayandırılıb.
Monitorinqlər bundan sonra da davam edəcək.
