COP 29 ərəfəsində paytaxtda aparılan irimiqyaslı abadlıq işlərində xüsusi əhəmiyyəti olan “Çiçəklənən Abşeron” layihəsinin əsası 2019-cu ildə qoyulub.
Bakuplus.az xəbər verir ki, KOBİA və “Bakı Abadlıq Xidməti”nin birgə təşəbbüsü ilə 5 ildən artıq davam edən böyük aksiya Pirşağı, Əmircan, Balaxanı, Ramana, Zirə, Maştağa və Novxanıda, o cümlədən Bakıdan kənarda yaşayan minlərlə ailəyə evlərini tərk etmədən iş görüb qazanmaq imkanı verib.
Layihə bitkiçiliyi, kənd təsərrüfatı emalını inkişaf etdirməklə yanaşı həm də zəhmətkeş sakinlərə bu sahədə təcrübə qazandırıb.
Xatırladaq ki, sözügedən kəndlərdə bəzi həyətlərə dibçəklər verilib. Yerli sakinlər də müəyyən qazanc müqabilində körpə tinglərə qulluq edərək bitkiləri böyüdüblər. Bakıda keçirilən dünya əhəmiyyətli ekoloji tədbir ərəfəsində əsasən əhalinin həssas təbəqəsinə əmanət edilmiş həmin dibçəklərdə yetişdirilən yüz minlərlə bitki sayəsində Pirşağı-Zuğulba yolunda, Zığ şosesi ətrafında geniş yaşıllıqlar yaranıb. Vaxtilə “Komsomol körpüsü” kimi tanınan yol ötürücü qovşaq yaxınlığında uzun illər baxımsız qalmış bataqlıqda gerçəkləşən “Bağbağat” layihəsində də “Çiçəklənən Abşeron”un şübhəsiz ki, payı var.
