Bakı Dövlət Sirkinin binası Bakıda, Səməd Vurğun küçəsi, 102-də yerləşir. Bina 1967-ci ildə memarlar Ənvər İsmayılov və Faina Leontyevanın layihəsi əsasında inşa edilib. Bu, Yaxın Şərqdə sirk üçün xüsusi inşa edilmiş yeganə bina hesab edilir.
1870-ci illərdən başlayaraq şəhərin müxtəlif yerlərində qastrola gələn müxtəlif sirk qrupları fəaliyyət göstərirdi. Burada mürəkkəb hava nömrələri, su sirki, attraksionlar nümayiş olunurdu. Bu tamaşaların təsiri altında Bakıda da yerli sənətçilər meydana çıxırdı.
Hələ 1898-ci ildə rus sirk sahibkarları olan Nikitin qardaşları Bakıda ilk sirk-zoopark təşkil etdilər. 1904-cü ildə onlar Şərqdə ilk olaraq, sirk binası inşa etdirirlər. Bu bina indiki Nizami küçəsi ilə Bülbül prospektinin kəsişməsində, Nəsimi bağının yerində yerləşirdi. Lakin 1906-cı ildə bu buna yanğın nəticəsində məhv olub. Həmin il Nikitin qardaşları köhnə sirkin yerində daşdan təzə bina inşa etdiriblər və bu bina 1916-cı ilə kimi xidmət edib. Həmin sirkin səhnəsində Üzeyir Hacıbəyovun “Şeyx Sənan”, “Şah Abbas” əsərləri səhnələşdirilib.
1917-ci ildə Nikitin qardaşlarının dağıdılmış binaları yerində Yefimov qardaşları yeni sirk binası inşa etdirirlər. Lakin bu bina da 1924-cü ildə yanğında məhv olur. [https://circus.az/news/cbc-telekanali-baki-dovl-t-sirkind-olub]
1967-ci ildə memarlar Ənvər İsmayılov və Faina Leontyevanın layihəsi əsasında sirk üçün dairəvi bina inşa edilmişdir. Bu bina yüksəklikdə tikildiyindən o zamanlar şəhərin bir çox yerlərindən görünürdü. Bina 2400-2500 nəfər tamaşaçı üçün nəzərdə tutulmuşdur. Kompleksin sahəsində qastrola gələn artistlərin yaşaması üçün mehmanxana tikilmişdi. [Эфендизаде Р.М. Архитектура Советского Азербайджана. Москва-1986]
Bina o dövrün sirk avadanlığı ilə təchiz olunmuşdur. SSRİ-də ilk dəfə olaraq, sirkin binasında bir-birini əvəz edən üç müxtəlif manej quraşdırılırdı: təbii kauçuk örtüyü olan əsas manej, kənarında baryerləri olmayan ikinci manej və nəhəng su hovuzundan istifadə edilməsinə imkan yaradan üçüncü manej. Bu manejlərin yerdəyişməsi qısa bir zamanda tamaşaçıların gözü qarşısında baş verirdi. [Rəcəb Məmmədov. Şəhərimizin memarlıq incisi. Mədəniyyət.- 2012.- 26 dekabr.- S. 10.]
Bina ölkə əhəmiyyətli abidələr siyahısına daxil olunsa da, hal-hazırda baxımsız vəziyyətdədir.
