Son 200-300 ildə Bakıda olmuş səyyahlar və alimlər Bakının yaxınlığındakı su altında qalmış şəhərlər haqqında çox sayda əfsanə və rəvayətlər yazıblar. Onların sırasında Şəhri-yunan, yəni Yunan şəhərinin adı da çəkilir.
Orta əsr Şərqinin ən böyük şairlərindən biri Şeyx Nizami Gəncəvi “İsgəndərnamə” poemasında bu şəhər haqqında maraqlı bir məlumat verir. Şairin yazdığına əsasən, Makedoniyalı İsgəndər səfəri zamanı Bakıya gəlir. O, Bakının sahibi Sədan tərəfindən təntənəli qarşılanır. Lakin İsgəndər böyük bir yunan şəhərinə çatanda oranın əhalisi təslim olmaq istəmir. Bu səbəbdən İsgəndər şəhəri dağıtmaq qərarına gəlir. Nizamiyə əsasən, şəhər dəniz səthindən aşağıda idi, lakin onunla dənizin arasında dağdan bir maneə var idi. İsgəndərin köməyinə alim Ərəstun gəldi. O, 700 batman (köhnə çəki ölçüsü) miqdarında bir cüt yağ düzəltdi. Bu yağ daşı əhəng kimi əritdi. Bu qayda ilə suyun yolunu açdılar və şəhəri suya batırdılar. Su altında qalan şəhərin xilas olan əhalisinin bəzisi Gilan şəhərinin əsasını qoydu. [Bakıxanov Abbasqulu ağa. Gülüstani-İrəm. Bakı-2000]
İndiyədək Salyan rayonunda yerli əhali su basmış Şəhri-yunan şəhəri haqqında rəvayətlər danışır. Bəzi mənbələrə görə, şəhər yunanlar tərəfindən dağıdılıb su altında qaldığından onun xarabalıqları Şəhri-yunan adlandırılmağa başlayıb. Bu hadisə Makedoniyalı İskəndərin dövründə də baş verə bilərdi. [Каджар Ч. Баку и Европа. Исторические этюды. Баку-2015]
Tarixçi Bakıxanov XIX əsrdə Şəhri-yunanın axtarışına təşəbbüs göstərsə də, heç bir nəticə əldə etməmişdir. [Самир Мамедов. Колебание уровня Каспийского моря и древние прикаспийские города. Баку-2018]
