“Hicran” tamaşası ilk dəfə 1973-cü ildə səhnələşdirilib. İmprovizələrdən ibarət tamaşa yazıçı Sabit Rəhmanın Musiqili Teatrda səhnələşdirilmiş sayca ikinci əsəridir.
Sabit Rəhman “Hicran” əsərini yarımçıq yazmışdı. Tamaşa üçün nəzərdə tutulan əsərin yalnız iki pərdəsi hazır idi. Əsərin üçüncü hissəsini teatrın o vaxtkı direktoru və bədii rəhbəri Şəmsi Bədəlbəyli hazırladı. Bununla da əsər səhnələşdirilərək tamaşaya qoyuldu. Tamaşanın bəstəkarı Emin Sabitoğlu idi.
O vaxt teatrda bir üçlük var idi: Nəsibə Zeynalova, Siyavuş Aslan və Hacıbaba Bağırov. Tamaşada Hacıbaba Bağırov “Mitoşbala”, Nəsibə Zeynalova “Qızbacı”, Səyavuş Aslan “Dadaşbala” obrazlarını canlandırırdılar. Bu üçlük “Hicran” tamaşası ilə bütün Azərbaycanda məşhur oldu. Bu tamaşada yalnız Nəsibə Zeynalovanın canlandırdığı obraz üçün ehtiyat aktyor olmayıb. Onun etdiyi improvizələri ondan başqa teatrda heç kim bacarmırdı. []
Bir dəfə Nəsibə xanım xəstələndiyi üçün Moskvaya müalicəyə gedir. Onun oynadığı “Qızbacı” rolunu başqa aktrisa oynayır və tamaşa uğursuz olur. Bundan xəbər tutan Nəsibə Zeynalova Hacıbaba Bağırovdan və Səyavuş Aslandan inciyir. Bundan sonra aktrisa bir daha “Qızbacı” rolunu ifa etməyəcəyini bildirir. Səyavuş və Hacıbabanın bir-birindən küsülü olmalarının səbəbi isə onlardan kimin Musiqili teatrın direktoru və bədii rəhbəri seçilməsi ilə bağlı idi. Aktyorlar küsülü olduqları üçün tamaşa bir müddət səhnələşdirilmir.
1983-cü ildə rejissor Ələkbər Kazımovski bu tamaşanı lentə almaq istəyir. Tamaşa artıq iki il idi ki, oynanılmırdı və aktyorlar öz sözlərini unutmuşdular. Məşq təyin olunur və aktyorlar improvizə edir, əsərdə olmayan sözləri deyir. Bu səbəbdən rejissor Şəmsi Bədəlbəyli öz əsərini tanımayaraq əsəbləşir. Tamaşanın efirə gedən variantı tam improvizədən ibarət olur.
1991-ci ildə Hacıbaba Bağırov və Səyavuş Aslan Nəsibə xanımın 75 illik yubileyinə gələrək “Hicran” tamaşasından bir səhnəcik göstərirlər və bundan sonra aktyorlar barışırlar. [https://aqreqator.az/az/medeniyyet/1163353]
