“Ad günü” filmi rejissor Rasim Ocaqov tərəfindən 1977-ci ildə ekranlaşdırılıb. [Aydın Kazımzadə. Kino və Zaman (1923-2016). Bakı-2016]
Ekran əsəri Rüstəm İbrahimbəyovun “Ad günü” və “Ezamiyyət” hekayələri əsasında Moskva Mərkəzi Televiziyasının sifarişi ilə çəkilib. Lirik-psixoloji janrda çəkilmiş film dostluq haqqındadır. Burada, həmçinin əxlaqi-etik məsələlərə toxunulur və müasirlərimizin məişət və yaşayışı, gündəlik həyatları əks olunub.
Bədii televiziya əsəri Rüstəm İbrahimbəyovun və Rasim Ocaqovun uzun müddətli birgə yaradıcılıq işinin başlanğıcı oldu. Filmin rejissoru Rasim Ocaqov, ssenari müəllifi Rüstəm İbrahimbəyov, bəstəkar Emin Sabitoğlu, quruluşçu rəssam Kamil Nəcəfzadə, operator Kənan Məmmədov olub. Baş rollarda Hacı İsmayılov, Şəfiqə Məmmədova, David Uplisaşvili, Sədayə Mustafayeva, Yaşar Nuri, Səməndər Rzayev və başqaları çəkiliblər.
Filmin ilk baxışı 11 fevral 1977-ci ildə baş tutub. Ekran əsərinin nümayişindən sonra rejissor Moskva sakinindən məktub alır. Məktubda deyilirdi: “Televiziya ilə baxdığım “Ad günü” filminə görə sağ ol! Ağıllı, istedadlı, xeyirxah və təmənnasız insanla görüşdən özümü xoşbəxt hesab edirəm. Yalnız bu keyfiyyətlərə malik insan öz qəhrəmanlarını belə görər və səhv etmədən aktyorları tapa bilərdi. Bəzi səhnələr, məncə, “Çaplinsayağıdır”, “Ad günü” professional filmdir...”. [https://adalet.az/az/posts/detail/ad-gunu-nun-ad-gunu-filmin-ilk-baxis-tarixinden-45-il-otur-1644574741]
“Ad günü” filmi 1979-cu ildə Bakıda keçirilən VIII Ümumittifaq televiziya filmləri festivalının birinci mükafatına, 1980-ci ildə Berlində ADR televiziyasının diplomuna, həmin il filmin yaradıcı heyəti Azərbaycan Dövlət mükafatına layiq görülmüşdür. [https://www.medeniyyet.az/page/news/3765/Ad-gunu-filmi-Moskvada-berpa-olunur.html]
