Əlabbas Mütəllib oğlu Mütəllibzadə 1883-cü ildə Bakıda anadan olub. O, Müznib təxəllüsü ilə tanınıb.
Əlabbas yaradıcılığa şair kimi başlayıb. 1905-ci ildə Rusiyada baş vermiş inqilabdan sonra Mütəllibzadə lirik-romantik janrın və "Molla Nəsrəddin" ədəbi məktəbinin təsiri ilə çarizmi, ictimai ətaləti və dini fanatizmi tənqid edən satirik şair kimi tanınıb. [Azərbaycan Sovet Ensiklopediyası. Cild VII. Bakı-1983]
Mütəllibzadə "Müsavat" partiyasının üzvü olub, M.Ə.Rəsulzadə ilə dostluq və əməkdaşlıq edib. O, qəzetlərdə Azərbaycan xalqını çarizmin milli müstəmləkəçilik siyasətinə qarşı üsyana çağırdığına görə 1912-ci ildə Sibirə sürgün edilib. Həmin il sürgündən qayıtdıqdan sonra "İqbal" qəzetində, özünün nəşr etdiyi "Dirilik" jurnalında, "Müsavat" partiyasının "Türkçülük", "İslamçılıq" və "Müasirlik" ideallarını təbliğ edib. [Əlabbas Müznib. Seçilmiş əsərləri. Bakı-2006]
Mütəllibzadə yaxın Şərq və Azərbaycan folklorunun toplayıcısı, tərcüməçisi və naşiri kimi fəaliyyət göstərib. Yazıçı məşhur ərəb folklor abidəsi olan "Min bir gecə"ni, "Molla Nəsrəddin lətifələri" və "Bəhlul Danəndə lətifələri”ni nəşr etdirib. Bundan əlavə, o, 1912-ci ildə Məhəmməd Peyğəmbərin həyatından bəhs edən "Muxtarnamə" kitabını fars dilindən Azərbaycan dilinə çevirib.
Azərbaycan Xalq Cümhuriyyəti dövründə Müznib milli istiqlal ideyalarını fəal təbliğ edən ziyalılardan biri olub. Bu dövrdə o, “Azərbaycan”, "İstiqlal" qəzetlərində dövlətçilik ideyalarını təbliğ edib. [http://www.anl.az/down/meqale/medeniyyet/2016/mart/481106.htm]
Sovet hakimiyyətinin ilk illərində şair "Qarabağ füqərası birliyi" qəzetinin redaktoru olub, həmçinin "Kommunist" qəzetində mədəni-məişət mövzularında şeirlər dərc edib. Şairin "Hürriyyəti-bəşəriyyə", "Çəkməsilən", "Sibirya məktubatı", "Ürək yanğısı", "Tikan kolu" və s. əsərləri var. O, "Hilal", "Şəhabi-saqib", "Zənbur", "Dirilik", "Babayi-Əmir", "Övraqi-nəfisə" mətbuat orqanlarının naşiri və redaktoru olub. [Azərbaycan Sovet Ensiklopediyası. Cild VII. Bakı-1983]
O, 1937-ci ildə milli ruhlu əsərlərinə və Osmanlı qoşunlarının Bakıya gəlməsini alqışlayan şeirinə görə 8 il həbs cəzasına məhkum olunub və Sibirə göndərilib.
Əlabbas Mütəllibzadə 28 avqust 1938-ci ildə Rusiyanın Vladivostokdakı xüsusi cəzaçəkmə məntəqəsində vəfat edib. 1956-cı ildə ona bəraət verilib. [Azərbaycan Xalq Cümhuriyyəti Ensiklopediyası. Cild II. Bakı-2005]
