Məmmədsadıq Qafar oğlu Nuriyev 5 mart 1919-cu ildə Bakıda anadan olub.
O, 1928-ci ildən Bədəl bəy Bədəlbəylinin məktəbində təhsil alıb. Orta təhsilini bitirdikdən sonra Məmmədsadıq 1935-ci ildə Azərbaycan Dövlət Teatr Məktəbinin aktyorluq fakültəsinə daxil olub. 1937-ci ildə təhsilini başa vurduqdan sonra C.Cabbarlı adına İrəvan Dövlət Azərbaycan Dram Teatrında çalışıb. [Şəhla Əmirli. Kiçik rolların məharətli ifaçısı. Mədəniyyət.- 2019.- 24 may.- S.1;7.] [http://www.az.baku-art.com/az/bu-gun-taninm-sh-teatr-ve-kino-aktyoru-memm-dsad-q-nuriyevin-dogum-g-n-d-r]
Aktyor 1946-cı ildə Gəncə Dövlət Dram Teatrında fəaliyyət göstərib.
1950-ci ildə Məmmədsadıq Azərbaycan Dövlət Filarmoniyası nəzdindəki Musiqili komediya estrada ansamblında, sonra isə “Azdrama”da işləyib, daha sonra yenidən estrada ansamblına qayıdıb. 1954-cü ildən ömrünün sonuna qədər Azərbaycan Dövlət Akademik Musiqili Teatrında çalışıb. [Şəhla Əmirli. Kiçik rolların məharətli ifaçısı. Mədəniyyət.- 2019.- 24 may.- S.1;7.] [https://www.youtube.com/watch?v=ZZU3kEGg1PY]
Nuriyev həm teatr, həm də kino səhnəsində dramatik və komik rolları eyni ustalıqla ifa etdiyi üçün onu “Vücud” deyə çağırırdılar. Aktyor “Yeddi oğul istərəm”də Kosa, “Əhməd haradadır?”da fəhlə Əhməd, “Ulduz”da Bayram, “Sehrli xalat”da tacir, “Uşaqlığın son gecəsi”ndə Davud, “Bizim Cəbiş müəllim”də qaçqın, “Koroğlu”da kosa Səfər, “O olmasın, bu olsun”da bazardakı adam və s. kimi müxtəlif rolları ifa edib. [http://www.az.baku-art.com/az/bu-gun-taninm-sh-teatr-ve-kino-aktyoru-memm-dsad-q-nuriyevin-dogum-g-n-d-r]
“Uşaqlığın son gecəsi” filmində canlandırdığı “Davud” obrazı aktyora ən çox məşhurluq gətirən obraz olub. Aktyorun filmdə ifadə etdiyi sözlər indi də tamaşaçılar tərəfindən xatırlanır. [https://www.youtube.com/watch?v=ZZU3kEGg1PY]
Məmmədsadıq heç bir fəxri ad almamışdır. Oğlu aktyor Yaşar Nuri Əməkdar artist adını alarkən çıxışında demişdi : “Yazıq atam neçə il səhnədə külüng vurdu, bir quru ada da həsrət qaldı”. [https://kulis.az/xeber/media/ona-qarsi-colorredvnimatelnicolor-olmadilar-yasar-nurinin-fexri-ada-hesret-qalan-atasi-colorredmaraqli-faktlar-color-36840]
Məmmədsadıq Nuriyev 25 mart 1975-ci ildə vəfat edib. [https://www.youtube.com/watch?v=ZZU3kEGg1PY]
