Əsl peşəsi fortepiano müəllimliyi olan Töhfə Əzimova ilk dəfə aktrisa sənətinə 1957-ci ildə başlayıb. Həmin il rejissor Lətif Səfərov “Qızmar günəş altında” filmi üçün gənc ifaçı xanım axtarışında idi. Ali musiqi təhsili alan Töhfə xanım rejissorun diqqətini cəlb edib və o, “Nərminə” roluna dəvət olunub. [https://az.baku-art.com/az/ehmed-haradadir-filminin-leylas-tohfe-zimova]
“Qızmar günəş altında” filminin çəkilişlərində Töhfə xanım kino rəssamı Cəbrayıl Əzimovla tanış olub və 1958-ci ildə onlar ailə həyatı qurublar.
Əzimova 1963-cü ildə “Əhməd haradadır?” filmində Leyla roluna çəkilib. Onlarla qız bu obraz üçün sinağa çağırılır və nəhayət, biri seçilir. Lakin həmin qızın erməni olduğunu bilən rejissor Adil İsgəndərov ondan imtina edir. Filmin quruluşçu rəssamı olan Cəbrayıl Əzimov Adil İsgəndərovun köməyinə çatır. Əzimov rejissorun sözünü yerə salmır və həyat yoldaşı olan Töhfə xanımın filmdə çəkilməyinə razılıq verir. [Ramilə Qurbanlı.-Unikal.- 2020.- 22 avqust.- S.21]
Həmin roldan sonra Töhfə xanım bütün respublikada məşhurlaşır. Bu, aktrisanın çəkildiyi ikinci və sonuncu filmi olur. Bundan sonra o, ömrünün sonunadək musiqi məktəbində fortepiano dərsləri verib.
Töhfə Əzimova 4 fevral 2003-cü ildə uzun sürən xəstəlikdən sonra vəfat edib. O, Yasamal qəbiristanlığında dəfn olunub. [https://news.milli.az/culture/994983.html]
