Bəsti Əli qızı Cəfərova 13 iyun 1959-cu ildə Bakı şəhərində anadan olub.
O, 1976-cı ildə Azərbaycan Dövlət İncəsənət İnstitutunun dram və kino aktyorluğu fakültəsinə daxil olub. Tələbəlik dövründə Akademik Milli Dram Teatrına dəvət olunub, burada Əkrəm Əylislinin “Quşu uçan budaqlar” psixoloji dramında Səltənət rolunu oynayıb.Ədil İsgəndərovun kursunda təhsil alan Bəsti Cəfərova ali təhsilini 1980-ci ildə başa vurub. Təyinatla Akademik Milli Dram Teatrına göndərilib və aktyor truppasına aktrisa götürülüb.
Akademik Milli Dram Teatrında Əsmər («Günah», R.Əlizadə), Bədidə və Nigar («Qanlı Nigar», S.Şendil), Gülruh, Azadə xanım, Ağabəyim ağa, Lalə, Sürəyya, Xurşidbanu Natəvan, («Şeyx Xiyabani», «Dəlilər və ağıllılar», «Hökmdar və qızı», «Büllur sarayda», «Tənha iydə ağacı», «Xurşidbanu Natəvan», İ. Əfəndiyev), Solmaz («Od gəlini»,C. Cabbarlı), Martrio («Dişi canavar», F. Q. Lorka) və s. rollari ifa edib.
Aktrisa, həmçinin Azərbaycan Dövlət Televiziyasında hazırlanmış tamaşalarda da iştirak edərək, Pəri («Solğun çiçəklər», Cəfər Cabbarlı), Gülay («Ər və arvad», Mar Bayğıyev), Alina («Astana», Anatoli Dudarev), Rəna («Analar», Əzizə Cəfərzadə), Ağabəyim ağa («Güllələnmiş heykəllər», Hüseynbala Mirələmov) rollarında çəkilib.
Bundan əlavə, Cəfərova bir sıra filmlərdə rol alıb: “Ömrün yolları”, “Astana”, “Solğun çiçəklər”, “Analar”, “Gün aydın, mələyim” və s.
Bəsti Cəfərova 1989-cu ildə Azərbaycan Respublikasının Əməkdar artisti, 1998-ci ildə Xalq artisti fəxri adları ilə təltif olunub. Aktrisa Prezidentin fərdi təqaüdçüsüdür.
Mənbələr:
