Firəngiz Yusif qızı Əhmədova 23 sentyabr 1928-ci ildə Bakıda anadan olub.
Orta məktəbi bitirdikdən sonra o, Asəf Zeynallı adına Bakı Musiqi Məktəbində oxuyub. 1955-ci ildə Əhmədova təhsilini Azərbaycan Dövlət Konservatoriyasında davam etdirib.
Əmək fəaliyyətinə gənc yaşlarından başlayan Firəngiz Əhmədova 1946-1951-ci illərdə Azərbaycan radiosu xorunun, 1951-1988-ci illərdə Azərbaycan Dövlət Opera və Balet Teatrının solisti olub, 1989-1997-ci illərdə isə həmin teatrda ustad dərslərini aparıb.
Müğənni Üzeyir Hacıbəylinin “Koroğlu” operasında “Nigar”, Müslüm Maqomayevin “Şah İsmayıl”ında “Gülzar”, “Nərgiz”də “Nərgiz”, Fikrət Əmirovun “Sevil”ində “Sevil” və başqa rolların ifaçısı olub.
Firəngiz xanım, həmçinin müxtəlif filmlərdə mahnıların ifaçısı olub: “O olmasın, bu olsun”, “Sevil”, “Azərbaycan elləri”. [Mükərrəmoğlu M. Azərbaycan vokal sənətinin görkəmli nümayəndəsi. //Xalq qəzeti.-2018.- 23 sentyabr.- S.7.]
Firəngiz Əhmədova ictimai xadim kimi də fəaliyyət göstərib. O, 4-cü çağırış SSRİ Ali Sovetinə və 5-ci çağırış Azərbaycan Respublikası Ali Sovetinə deputat seçilib.
Əhmədova Bülbül, Müslüm Maqomayev, Rauf Atakişiyev və başqa böyük sənətkarlarla opera tamaşalarının nümayişi məqsədilə təşkil olunmuş qastrol səfərlərində olub. O, Sovet İttifaqına daxil olan respublikalarda, eləcə də Çexoslovakiya, Polşa, Bolqarıstan, Rumıniya və başqa ölkələrdə çıxış edib.
O, “Azərbaycan SSR Əməkdar artisti”, “Azərbaycan SSR Xalq artisti”, “SSRİ Xalq artisti” fəxri adlarına, “Lenin” və “Şöhrət” ordenlərinə layiq görülüb.
Firəngiz Əhmədova 16 dekabr 2011-ci ildə 83 yaşında Bakıda vəfat edib və I Fəxri xiyabanda dəfn olunub. [Fərəcova Z. Gözəl səsi ona böyük sevgi qazandırdı.Azərbaycan. - 2018.- 26 sentyabr.- S.11.]
