31 Dekabr - Dünya Azərbaycanlılarının Həmrəylik Günü bayramı kimi qeyd olunur.
16 dekabr 1991-ci ildə o zamanlar Naxçıvan Muxtar Respublikası Ali Məclisinin sədri vəzifəsini tutan Heydər Əliyev dünya Azərbaycanlılarının birliyini yaratmağın əhəmiyyətini vurğulayır və dekabrın 31-ni Dünya Azərbaycanlılarının Həmrəyliyi Günü elan edir. Bu təşəbbüs o vaxtın mərkəzi hakimiyyətinin də dəstəyini qazanır və rəsmən bayram kimi qeyd olunur.
Bu günün əsası 1989-cu ildə qoyulub. Həmin il, Berlin divarının dağılmasından sonra Azərbaycanda da sərhədləri dağıdıb ölkənin bütövlüyünü bərpa etmək arzusu əmələ gəlir. Noyabr ayında Naxçıvanda güney Azərbaycanla həmrəylik göstərmək məqsədilə sərhəd boyunca tədbirlər keçirilməsi haqda qərar qəbul edilir. Sərhəd boyunca kəndlərdə çadırlar qurulur, burada şüarlar, milli ruhlu şeirlər, mahnılar səslənir, gecələr tonqallar qalanır. Güneyli soydaşları da sərhəddə toplamaq üçün səs gücləndiricilərdən istifadə olunur. Bundan təşvişə düşən SSRİ dövlət xadimləri hərəkatçılara mane olmağa çalışırlar, lakin buna nail ola bilmirlər.
31 dekabr 1989-cu il saat 12-dən etibarən bütün Naxçıvan boyunca insanlar sərhədləri sökməyə başlayırlar. Onlar Azərbaycanla İran arasındakı sərhəd dirəklərini yıxıb yandırırlar. Araz çayı boyunca hər iki tərəfdən insanlar yığışıb söhbət edirlər, qohumlarını tapırlar. Soyuq qış günləri olmasına baxmayaraq, Arazı üzüb keçərək, öz qohumlarına qovuşurlar.
