Maştağa qoçusu Nəcəfqulu məşhur Bakı qoçularından biri idi. Bakı tarixində bir çox qanlı hadisələr onun əli ilə törədilmişdir. Lakin 1918-ci ildə, Bakıda mövcud olan qarışıqlıqlar zamanı, qoçu xalqın müdafiəsinə qalxdı. [Qılman İlkin. Bakı və bakılılar. Bakı-2006]
1918-ci ilin əvvəlindən Bakının mərkəzi küçələrində tez-tez erməni-müsəlman toqquşmaları baş tverirdi. Silahsız müsəlmanların ümidi yalnız imkanlı şəxslərə, bir də qoçu dəstələrinə qalmışdı. Qoçu Nəcəfqulu da bütün qənaətlərini verib, silah-sursat aldırmışdı. O, məhəllədəki oğlanları ətrafına toplayıb, tez-tez məşqlər təşkil edərdi.
Qoçu Nəcəfqulunun rəhbərliyi ilə yaradılmış “Maştağa dəstəsi” Bakı kəndləri və köhnə Bakı küçələrində daşnaklara qarşı əsl müqavimət ocağına çevrilmişdi. “Qoçu Nəcəfqulu” kitabında bu hadisələr əks olunub: “Cəbhə xətti Bazarnıdan keçirdi. Küçənin sağ tərəfi artıq ermənilərin əlində idi. Nəcəfqulunun adamları bircə nəfər düşməni belə küçədən keçməyə qoymurdular…Odur ki, hamıya tapşırılmışdı ki, son gülləyə kimi vuruşsunlar. Güllə qurtaranda isə əks-hücuma keçib xəncərlərini işə salsınlar… tarixin bu acı dönəmində bütün yükün ağırlığı el arasında heç də həmişə müsbət qarşılanmayan qoçuların çiyninə düşmüşdü. Səhərə yaxın sursat tükənmək üzrə idi. Nəcəfqulu son, qəti sıçrayışa hazır idi. Elə bu zaman çoxdankı rəqibi Qoçu Teymur bəy Aşurbəyovun onlara çatdırdığı patronlar camaatın qanının arasına girdi. Küçənin hər iki tərəfində ölənlərin sayı-hesabı yox idi. Qoçu Nəcəfqulu özü də bir neçə güllə yarası almışdı”. [Rzayeva N. Qoçu Nəcəfqulu. Bakı-2008]
Qafqaz İslam Ordusu Bakı kəndlərinə daxil olduqdan sonra dəstə silahlı heyətini genişləndirərək “Maştağa qarnizonu” adını alıb və Bakı üzərinə həlledici hücumda iştirak edib. Türk ordusunun generalı Nuru Paşa Qoçu Nəcəfqulunu göstərdiyi igidliyə görə ordenlə təltif edib.
Lakin sovet dövründə Qoçu Nəcəfqulu bolşeviklər tərəfindən bolşevik Əli Bayramovun qətlində ittiham olunmaqla həbs edilib. O, güllələnməyə məhkum edlib və 1920-ci il may ayının 28-dən 29-na keçən gecə Bayıl qazamatının həyətində güllələnib. Bu zaman onun 28 yaşı var idi.
Qoçu Nəcəfqulu Üzeyir Hacıbəyovun “O olmasın, bu olsun” operettasında yaratdığı qəhrəmanın prototipidir. [Fəxriyyə Sakitqızı. Qoçu Əsgərin prototipi haqda reallıqlar// “Yaddaş” qəzeti. 19 aprel. 2007]
