Azərbaycanda bədii filmlərin çəkilişi 1916-cı ildən sonra başlayıb. Bu hadisə "Filma" səhmdar cəmiyyətinin adı ilə bağlı idi. İlk bədii film azərbaycanlı yazıçı, İbrahim bəy Musabəyovun əsəri əsasında çəkilmiş "Neft və milyonlar səltənətində" adlı səssiz film idi. Bu film Bakı neft sahibkarlarının vəsaiti hesabına çəkilmişdi. İctimai ziddiyyətlər, varlıların qəddarlığı, pul hərisliyi sadəlövh şəkildə olsa da filmdə öz əksini tapmışdılar. Filmin çəkilişi Bakıda və onun ətraf kəndlərində aparılmışdı. Pavilyon səhnələri isə Tiflisdə çəkilmişdi.
[https://azerbaijan.az/related-information/258]
Filmin maraqlı epizodlarından biri, o zaman milyonçu Səlimovun Balaxanıda neft mədənində baş vermiş yanğının lentə alınması idi. Rejissor B.Svetlov və operator Q.Leçberq bu yanğını filmə daxil etmiş və onun effektini xeyli artırmışdılar.
[Qılman İlkin. Bakı və bakılılar. Bakı-2006]
Filmdə çəkilmək üçün Bakı teatrlarından bir çox aktyor dəvət olunmuşdu. Baş rolda isə Hüseyn Ərəblinski çəkilmişdi. Film ekrana çıxmamışdan əvvəl geniş reklam təşkil edilmiş, Bakı qəzetlərində elanlar verilmişdi. Bunlardan əlavə xüsusi buklet də buraxılmışdı, buraya filmdən ayrı-ayrı kadrlar daxil edilmişdi.
[Sadıxov Nazim. Azərbaycan bədii kinosu. Bakı-1970]
Bakıda filmlərin çəkilişi XX əsrin əvvəllərinə təsadüf edir. Bu illərdə xarici firmaların nümayəndələri bir çox qısametrajlı sənədli filmlər çəkirdilər. Küçələrdə, limanlarda, vağzallarda baş verən maraqlı hadisələr, şəhərin görkəmli yerləri sənədli filmlərin əsas süjetini təşkil edirdi.
[Qılman İlkin. Bakı və bakılılar. Bakı-2006]
