Vasif Adıgözəlov 28 iyul 1935-ci ildə Bakıda, muğam ustası Zülfü Adıgözəlovun ailəsində anadan olub.
O, ilk musiqi təhsilini Üzeyir Hacıbəyov adına Azərbaycan Dövlət Konservatoriyasının nəzdindəki onillik musiqi məktəbində pianoçu kimi alıb, 1953-cü ildə isə Konservatoriyaya daxil olub.
Adıgözəlov əmək fəaliyyətinə 1958-ci ildən Radio və Televiziya Komitəsində musiqi redaktoru kimi başlamışdır. Sonralar Azərbaycan Bəstəkarlar İttifaqının məsul katibi, M.Maqomayev adına Azərbaycan Dövlət Akademik Filarmoniyasının baş musiqi redaktoru, A.Zeynallı adına Bakı Musiqi məktəbinin direktoru və s. vəzifələrdə çalışmışdır. Bəstəkar 1972-ci ildən konservatoriyada əsas işçi kimi müəllimlik edirdi.
Vasif Adıgözəlov 2 operanın (“Ölülər”, “Natəvan”), 5 musiqili komediyanın, 4 oratoriyanın (dramatik süjeti olan irihəcmli musiqi əsəri), 3 kantatanın (xorla oxunan təntənəli musiqi əsəri), 4 simfoniyanın müəllifidir. O, həmçinin “Kişi sözü”, “Qaraca qız”, “Qəribə əhvalat” kimi filmlər üçün mahnılar bəstələyib. [Təhmirazqızı S.“Yüz il ömür sürəydim...”. Xalq qəzeti.-2006.- 21 sentyabr.- S. 8.]
Vasif Adıgözəlov “Bakı” (ifaçı Şövkət Ələkbərova), “Təkcə səndən xoşum gəlir” (ifaçı Akif İslamzadə), “Mən gəzirəm hər yanı” (ifaçı Qaya ansamblı), “Gözləməsin, neyləsin” (ifaçı Flora Kərimova) mahnılarına musiqi bəstələyib. [Hüseynova S. Əbədi sənət karvanı. Xalq qəzeti.- 2010.- 28 iyul.- S. 4.]
Bəstəkarın oğlu, dirijor Yalçın Adıgözəlov atası haqqında belə deyir: “Atamın yazdığı əsərlərin hamısı səhnəyə qoyuldu, ifa olundu və yazıldı. Masa üstündə bir dənə də əsəri qalmadı. Bu baxımdan atam çox xoşbəxt sənətkardır.” [https://www.youtube.com/watch?v=g8pJjTp8DAo]
Vasif Adıgözəlov “Azərbaycan SSR Əməkdar incəsənət xadimi”, “Azərbaycan SSR Xalq artisti” fəxri adlarına layiq görülüb, Dövlət Mükafatı laureatı adını alıb və Azərbaycan Bəstəkarlar İttifaqının I katibi seçilib. Bəstəkar “Şöhrət ordeni”, “İstiqlal ordeni” ilə təltif olunub.
Əslən qarabağlı olan Vasif Adıgözəlov torpaqların işğalından sonra “Qəm karvanı”, “Şuşam, lay lay” əsərlərini bəstələyib. Onun arzusu “Qarabağ şikəstəsi” oratoriyasının Cıdır düzündə səsləndirilməsi idi. Onun vəsiyyətini isə oğlu yerinə yetirib. 2021-ci ildə Xarı Bülbül festivalında Vasif Adıgözəlovun əsərləri Yalçın Adıgözəlovun rəhbərliyi ilə səslənib. [https://azvision.az/news/261028/-susada-atamin-vesiyyetini-yerine-yetirdim--yalcin-adigozelov-.html]
Vasif Adıgözəlov 16 sentyabr 2006-cı ildə vəfat edib və Bakının Birinci Fəxri xiyabanında dəfn olunub.
