Aktyor Əsgər Məmmədoğlu 9 fevral 1946-cı ildə Bakıda anadan olub. O, aktyor Adriano Çelentanoya bənzədiyi üçün onu “Azərbaycanın Çelentanosu” adlandırırdılar.
Əsgər aktyor olacağına 14-15 yaşlarında Akademik Milli Dram Teatrında Şekspirin “Qış nağılı”na, Cəfər Cabbarlının “Almaz”ına baxdıqdan sonra qərar verib. O, 1975-ci ildə Azərbaycan Dövlət Mədəniyyət və İncəsənət Universitetinin dram və kino aktyorluğu fakültəsini bitirib. Aktyor 1977-ci ildə Azdramanın artist heyətinə qəbul edilib. 1982-ci ildə Sumqayıt Dövlət Dram Teatrında fəaliyyət göstərib, bir müddət sonra isə Tədris Teatrına keçib. 1987-ci ildə yenidən Azdramaya qayıdıb və onun səhnəsində müxtəlif rolları oynayıb. [Kaspi.- 2015.-23 dekabr. S. 12] [Mədəniyyət.- 2021.- 10 fevral. S. 1;6]
Əsgər Məmmədoğlu “Evləri köndələn yar”, “Qatarda”, “Yaşıl eynəkli adam” tamaşalarında, “Qərib cinlər diyarında”, “Yol əhvalatı”, “Alma almaya bənzər” kimi filmlərdə rolları canlandırıb. [Kaspi.- 2015.-23 dekabr. S. 12] [https://kulis.az/news/36152]
Aktyor, xüsusilə “Bəyin oğurlanması” filmindəki Ələsgər obrazı və onun “nə var e, Ələsgər, Ələsgər” sözləri ilə məşhurlaşıb. O, 1980-ci ildə Alen Delonun da çəkildiyi “Tehran-43” filmində rol alıb. Lakin onun çəkildiyi bir çox səhnələr filmdən çıxarılır və aktyor “bu film olduğu kimi yayımlansaydı, mən bütün ittifaqda məşhur idim” sözlərini deyir. [https://kulis.az/news/36152]
Sənətkar baş rollarda oynamağı sevmirdi, böyük rolları əzbərləməyin, oynamağın zülm olduğunu deyirdi: “Bir tamaşada rolum 20 dəqiqə idi, əzbərləyənə kimi yoruldum. Mənimki elə budur, girim tamaşaya, tamaşaçının əhvalını qaldırıb çıxım”. Ömrünün sonunadək bu amalına sadiq qalıb. [Kaspi.- 2015.-23 dekabr. S. 12] [https://news.milli.az/showbiz/419930.html]
Əsgər Məmmədoğlu Əməkdar artist adına layıq görülüb. [Kaspi.- 2015.-23 dekabr. S. 12]
Əsgər Məmmədoğlu 21 dekabr 2015-ci ildə vəfat edib və Bakının “Qurd qapısı” qəbiristanlığında dəfn olunub.
