Tərsa piri Buzovna qəsəbəsində yerləşib. Bu abidə Nəsrani məhəlləsində yerləşdiyindən xalq arasında ona “Nəsrani piri” də deyilirdi.
Bəzi mənbələrə görə, bu pir III əsrə aid edilir və Abşeronda Qafqaz Albaniyasına aid yeganə məbəd hesab olunur. Abidəyə, həmçinin “Şəms qəbri” (Günəş qəbri) də deyilirdi. Bir şayiəyə əsasən, burada qədim bütpərəst ziyarətgahı var imiş və sonralar onun yerində xristian məbədi tikilmişdir. Deyilənə görə, bu məbədin tutumu 150 nəfər təşkil edirdi. [https://ourbaku.com/images/c/c5/Buzovna.pdf]
Rus səyyahı İlya Berezin bu abidəni belə təsvir edirdi: “Busonyada müqəddəs İlya və Andreyin qəbirləri diqqəti cəlb edir...qəbirlə üzbəüz dairəvi tağlı, kiçik, dördbucaqlı tikili var: burada… müqəddəs zahidlərin hücrəsi olub”. Onun sözlərinə görə, burada ərəb dilində iki kitabə mövcud olub. Onların birində 1706-cı il tarixi həkk olunmuşdur. Digər kitabədə isə binanın hicri təqvimi ilə 885-ci ildə (1480-1481), Şirvanşah Xəlilullahın hakimiyyəti dövründə Tənvər Tumanşah oğlu tərəfindən inşa edilməsi haqda məlumat verilib. [Березин И.Н. Путешествие по Дагестану и Закавказью. Том I. Казань-1849]
Bu pir hazırda dağılıb. Onun yerində yalnız xarabalıqları və iki sökük tağ qalıb. Lakin insanlar bu gün də niyyət tutub buraya gəlir, dağılmış divarlara mismar vurur, dəsmal bağlayır, şüşə sındırırlar.
[URIS id=77015]
