Mehdi Hənifə oğlu Hüseynzadə 22 dekabr 1918-ci ildə Bakıda, Novxanı qəsəbəsində anadan olub. Kiçik yaşlarında atasını itirən Mehdi əvvəl anasının, sonra bibisinin himayəsində böyüyüb.
1925-ci ildə 77 saylı məktəbə (hazırda 19 saylı məktəb) daxil olub. İlk müəllimləri yazıçı Süleyman Sani Axundov və bəstəkar Səid Rüstəmov idi. Gənc yaşlarından rəsmə, musiqiyə həvəs göstərən Mehdi məktəbi bitirdikdən sonra təhsilini Bakı rəssamlıq texnikumunda davam etdirir. O, axşamlar idarələrdən, kitabxanalardan, nəşriyyatlardan aldığı sifarişləri yerinə yetirər, plakatlar çəkər, şüarlar yazardı.
[Гусейнов А.А. Герои Советского Союза. Баку-2017]
1937-ci ildə Mehdi Leninqrad Xarici Dillər İnstitutunun fransız dili fakültəsinə daxil olur. Dördüncü kursda oxuyanda o, təhsilini Bakıda davam etdirmək üçün Pedaqoji İnstitutun dil və ədəbiyyat fakültəsinin ikinci kursuna keçirilir.
1941-ci ildə alman faşistlərinin Sovet İttifaqına hücumu başlayanda Mehdi könüllü olaraq cəbhəyə yazılır. 1942-ci ildə qvardiya leytenantı Mehdi Hüseynzadə Stalinqrad cəbhəsinə göndərilir, Kalaç rayonunda vuruşur. Həmin döyüşlərdə ağır yaralanır və əsir alınır. 1943-cü ildə Mehdi düşmənlərdən qaçaraq İtalyan-Yuqoslav 9-cu partizan korpusuna qoşulur. Burada o, kəşfiyyatçı kimi fəaliyyət göstərir və “Mixaylo” ləqəbi ilə tanınır. Mehdi Hüseynzadənin kəşfiyyat fəaliyyəti nəticəsində əksəriyyəti zabit olmaqla 1000-ə qədər faşist öldürülüb. Mixaylonun tutulması və ölümü üçün alman komandanlığı 400 min marka məbləğində mükafat vəd etmişdi.
[Nəzirli Ş.Ə. Əfsanəvi Mixaylo. Bakı-2013]
[https://mod.gov.az/az/pre/23446.html]
Hüseynzadənin başçılığı ilə partizanların İtaliyanın Udine şəhərindəki həbsxanasına hücumu nəticəsində 700 hərbi əsir, o cümlədən, 147 sovet əsgər və zabiti azad edilmişdir.
2(16) noyabr 1944-cü ildə, əməliyyatdan sonra geri qayıdan Mixaylo düşmənlə üz-üzə gəlir, qeyri-bərabər döyüşdə həlak olur. Kəşfiyyatçının partizan dostları onu indiki Sloveniya ərazisində yerləşən Çepovani kəndində dəfn edirlər.
1957-ci ildə Mehdi Hüseynzadəyə “Sovet İttifaqı Qəhrəmanı” adı verilir.
[Azərbaycan Sovet Ensiklopediyası X Cild. Bakı-1987]
“Uzaq sahillərdə”, “9-cu korpus”, “Təxəllüsü Mixaylo” filmləri Hüseynzadənin həyatından bəhs edir. Xalq şairi Süleyman Rüstəm “Eloğluma” şeirini onun xatirəsinə həsr edib. Nizami metro stansiyasının yaxınlığında, vaxtilə yaşadığı evin divarına qəhrəmanın xatirə lövhəsi vurulub.
